Tsikitsiky

        Itondray tsikitsiky aho é raha ho avy ianao ô
        Tsikitsiky tsy miharo tokelaka
        Izay mibitsika tena malefaka é
        Tsy ho ren'ny tia fosafosa
        Fa hanako any anatiko kosa ô
        Tsy ho ren'ny tia fosafosa ô ô ô ô
        Fa hanako any anatiko kosa

        Itondray safosafo aho é raha ho avy ianao ô
        Safosafo tsy re toy ny aloka
        Hifitsahako eo mba hihanoka é
        Tsy hosembanin'izay ahiahy
        Hampihoala ny fo sy fanahy ô
        Tsy ho sembanin'izay ahiahy ô ô ô ô ô
        Hampihoala ny fo sy fanahy

        Itondray kalokalo aho é
        Raha ho avy ianao ô
        Kalokalo toa rtsy maraina
        Ho ngononina fa tsy ho hiraina e
        Toy ny kalon'ny rivotra monja
        Raha mikalo fitia amin'ny onja ô
        Toy ny kalon'ny rivotra monja ô ô ô ô ô
        Raha mikalo fitia amin'ny onja

        Hafatrafatra ny ahy é
        Raha ho avy ianao ô
        Rediredin'ny tsy afa-manohatra
        Te haniny no sady misaotra é
        Te hihonona nefa miangavy
        Raha ho avy ianao ka ho avy ô
        Te hihonona nefa miangavy ô ô ô ô ô
        Raha ho avy ianao ka ho avy